فجرت عارضة الأزياء المصرية "ميرهان"، السبت، فضيحة مدوية بعدما كشفت عن تعرضها للتحرش من قبل بعض لاعبي منتخب مصر لكرة القدم، وذلك بالتزامن من افتتاح منافسات كأس أمم أفريقيا "كان 2019"، التي تحتضنها أرض الفراعنة، خلال الفترة من 21 يونيو/حزيران حتى 19 يوليو/تموز.

ونشرت “ميرهان” مقطع فيديو على حسابها بموقع "انستغرام" قالت خلاله: “استنوا عليا شوية النهاردة بس افضى وانزلكم حاجة هتسليكم جدا وهتحزنكم وتقرفكم برضو جدا بس ده الواقع اللي لازم نفهمه".

وأضافت: "والله يا جماعة أول امبارح ده كان يوم حافل، أول ما نزلت ستوري جديدة فجأة الناس دي ظهرت عندي".

وظهر في الفيديو حسابات 4 من لاعبي منتخب مصر، وهم "عمرو وردة" و"أيمن أشرف" و"أحمد حسن كوكا" و"محمود حمدي الونش".

وتابعت بالصور أن اللاعب "عمرو وردة" دخل لها على الخاص وكتب "بوكسينج ها ها ها"، فيما علق اللاعب "محمود حمدي الونش" على البوست الخاص بها برسالة تحمل علامة الإعجاب بجانب علامة قلب على المحادثة بينهما.

وأوضحت "ميرهان": "فجأة وراها على طول الرسايل بدأت"، مضيفة: "أولا أنا دايما برد على رسايلي خصوصا لو مصريين عشان محدش يقول واخدة في نفسها قلم، بس إن المنتخب الوطني كله يظهر عندي في نفس الوقت دي غريبة جدا وأكيد مش صدفة".

وتابعت: "ولحد كده كان عادي مفيش مشكلة، لكن واحد من الأساتذة يبعت يقولي أنا هعرف أجيب رقمك وانتى متعرفيش أنا مين وأنا محدش يطنشني دي بقى مش مظبوط".

وأكملت: "للأسف عندنا في مصر لما بيحبوا حد في مصر لما بيحبوا حد بيطلعوه السما كأنه بطل، والواقع غير كده خالص، احنا في مصر لو انتى بنت يبقى الغلط عليكي تلقائي بس احنا هنا مش في مصر، يا ريت الأساتذة يركزوا عالبطولة اللي الراجل الغلبان عندنا في مصر بيستلف ثمن الشاي عشان ينزل يتفرج عليكوا ده ما يجيلوش غلطة، والأستاذ اللي بيقولي انتي مش عارفة أنا مين؟ لا معرفش.. بس عرفت بقى لما سألت وعرفت إن ليك سوابق في المواضيع دي والكل عارفها".

وأردفت، قائلة: "يا جماعة خدوا بالكم قبل ما تتجرأوا وتعملوا لايك لصورة المنتخب، واضح إن اللعيبة سايبة البطولة وقاعدين عالانستجرام بيتفرجوا، مجال مقرف فعلا".

وانطلقت بطولة كأس أمم أفريقيا 2019، الجمعة، حيث فاز المنتخب المصري على نظيره الزيمبابوي، بنتيجة 1-0، وحمل الهدف توقيع "محمود حسن تريزيجيه".